୭ ବର୍ଷ ପରେ ସିବିଆଇ ର ନିଦ ଭାଙ୍ଗିଲା । ପୁଣି ସିସୋର ଗ୍ରୁପର ଚିଟଫଣ୍ଡ କେଳେଙ୍କାରୀ ନେଇ ପୂର୍ବତନ ମନ୍ତ୍ରୀ ଦେବୀ ମିଶ୍ରଙ୍କ ଘରେ ଚଢ଼ାଉ କଲା ସିବିଆଇ । ଏହି ଚଢ଼ାଉ ଉଦ୍ଦେଶ୍ୟ କଣ ତାହା ଠକେଇର ଶିକାର ହୋଇଥିବା ଚିଟଫଣ୍ଡ ଜମାକାରୀ ଓ ଓଡ଼ିଶାର ପ୍ରତିଟି ନାଗରିକଙ୍କ ପାଇଁ ଏବେ ଏକାଧିକ ପ୍ରଶ୍ନ ତିଆରି କରିଛି । ଓଡ଼ିଶାରେ ଚିଟଫଣ୍ଡ ତଦନ୍ତ ଏତେଦିନ ଧରି କାହିଁକି ଚାଲିଛି ? ଏହି ତଦନ୍ତ ପ୍ରକ୍ରିୟା ମଝିରେ ମଝିରେ ଧିମେଇ ଯିବାର କାରଣ କଣ ? ଦେଶର ସର୍ବୋଚ୍ଚ ତଦନ୍ତକାରି ସଂସ୍ଥା କଣ ପ୍ରମାଣ ଯୋଗାଡ କରି ପାରୁନାହିଁ ? ଜମାକାରୀଙ୍କୁ ନ୍ୟାୟ ଦେବାରେ ସିବିଆଇ ତଦନ୍ତ ସାହାଯ୍ୟ କରିବତ ? ଜମାକାରୀ ନିଜର ଟଙ୍କା ଫେରି ପାଇବେତ ? ଯଦି ନୁହେଁ ତେବେ ସିବିଆଇ ତଦନ୍ତ କାହା ସ୍ୱାର୍ଥରେ ?
ଏଭଳି ଅନେକ ପ୍ରଶ୍ନ ଏବେ ଲୋକଙ୍କ ମନରେ ଉଠିଛି । ସିସୋର ଗ୍ରୁପ ମୁଖ୍ୟଙ୍କୁ ଗିରଫ ପରେ ସିବିଆଇ କଣ ଜାଣିପାରିଲା ନାହିଁ ଏହି ଠକେଇରେ କିଏ କିଏ ସମ୍ପୃକ୍ତ ବୋଲି । ନେତା, ଅଫିସର, ଫିଲ୍ମ ନିର୍ଦେଶକ, ପ୍ରଯୋଜକ ଓ ସାମ୍ବାଦିକ ଏପରି ଅନେକଙ୍କ ନାଁ ରେ ଅଭିଯୋଗ ଓ ପ୍ରମାଣ ମଧ୍ୟ ରହିଛି ସିବିଆଇ ପାଖରେ, ତେବେ ବିଳମ୍ବର କାରଣ ବୁଝାପଡୁନି କାହିଁକି ?
ଯଦି ସିସୋର ଗ୍ରୁପରୁ ଟଙ୍କା ନେବାର ଅଭିଯୋଗରେ ନେତା ମାନେ ଦୋଷୀ, ତେବେ ଏହି ଠକ ସଂସ୍ଥାଠାରୁ ଉପକୃତ ହୋଇଥିବା ଆଇଏସ, ଆଇପିଏସ ଅଫିସର, ସିସୋର ର ପ୍ରଚାର ପ୍ରସାର କରିଥିବା ତଥାକଥିତ ଓଡ଼ିଶାର #1 ଟେଲିଭିଜନ ଓ ଖବର କାଗଜ, ସିସୋର ଗ୍ରୁପ ଠାରୁ ଟଙ୍କା ନେଇ ସିନେମା କରିଥିବା ନିର୍ଦେଶକ, ପ୍ରଯୋଜକ ଓ ସିସୋର ଅର୍ଥରେ ମଜଲିସ କରିଥିବା ସାମ୍ବାଦିକ ମାନେ ଦୋଷୀ କାହିଁକି ନ ହେବେ ? ଏହାର ଉତ୍ତର ସିବିଆଇ ଦେବକି?
ମଝିରେ ମଝିରେ କିଛି ନେତାଙ୍କ ଘରେ ଚଢ଼ାଉ କରିବା ଓ ଅଫିସରଙ୍କୁ ନୋଟିସ ପଠାଇବା ଖବର ଗଣମାଧ୍ୟମରେ ଚର୍ଚ୍ଚା ହେଉଛି । ମାତ୍ର ତାଙ୍କ ବିରୋଧରେ ଠୋସ କାର୍ଯ୍ୟାନୁଷ୍ଠାନ ନେବାରେ ସିବିଆଇ ଅସଫଳ ହେଉଛି କାହିଁକି ? ସର୍ବୋପରି ଯେଉଁ ଗଣମାଧ୍ୟମ ସଂସ୍ଥା ଗୁଡିକ ସିସୋର ଗ୍ରୁପ ଠାରୁ କୋଟି କୋଟି ଟଙ୍କା ବିଜ୍ଞାପନ ନେଇଛନ୍ତି, ସେଇ ସଂସ୍ଥାର ମୁଖ୍ୟଙ୍କ ବାବଦରେ ସିବିଆଇ ନିରବ କାହିଁ କି ?
The prize chits and money circulation schemes (banning) act 1978 ଅନୁଯାୟୀ ଏହି news channel ଓ ଖବର କାଗଜ ସଂସ୍ଥାର ମାଲିକଙ୍କ ବିରୋଧରେ କାହିଁକି ସିବିଆଇ କାର୍ଯ୍ୟାନୁଷ୍ଠାନ ନେଉନି ? ଖାଲି ସେତିକି ନୁହେଁ ସିସୋର ଗ୍ରୁପ ର ହଡପ ଟଙ୍କା ରେ ମଉଜ ମଜଲିସ କରିଥିବା ” ମାଟିର ବନ୍ଧନ ” ଚଳଚ୍ଚିତ୍ର ନିର୍ଦେଶକ ଙ୍କ ବାବଦରେ ସିବିଆଇ ଚୁପ କାହିଁକି ? କୋଟି କୋଟି ଟଙ୍କା ହଡପ କରିଥିବା ଏହି ସଂସ୍ଥା ଯଦି ଗଣମାଧ୍ୟମ ମାଲିକ ଓ ସାମ୍ବାଦିକ ଙ୍କ ପଛରେ ଅର୍ଥ ଖର୍ଚ୍ଚ କରିଥାଏ, ତେବେ ସେମାନେ କଣ ସିବିଆଇ ତଦନ୍ତ ପରିସର ଭୁକ୍ତ ହେବେ ନାହିଁ କି ?
ଏଣୁ ଜନସାଧାରଣ ଙ୍କ ମଧ୍ୟରେ ଏବେ ଉଠୁଥିବା ପ୍ରଶ୍ନର ଜବାବ ସିବିଆଇ ଦେବ ତ ? ଯଦି ତଦନ୍ତ ଠିକ ବାଟରେ ଚାଲୁଛି ଓ ଜମାକାରୀଙ୍କ ସ୍ୱାର୍ଥକୁ ସିବିଆଇ ଗୁରୁତ୍ୱ ଦେଉଛି ତେବେ କେବଳ ନେତା ଓ ଅଫିସରଙ୍କ ଠାରେ ସୀମିତ ନ ରହି କୋଟି କୋଟି ଟଙ୍କାର ଘୋଟାଲାରେ ସାମିଲ ଥିବା ଫିଲ୍ମ ନିର୍ଦେଶକ, ପ୍ରଯୋଜକ ଓ ଗଣମାଧ୍ୟମ ସଂସ୍ଥାକୁ ମଧ୍ୟ ଶୀଘ୍ର ତଦନ୍ତ ପରିସର ଭୁକ୍ତ କରି କାର୍ଯ୍ୟାନୁଷ୍ଠାନ ନେଉ ସିବିଆଇ, ନହେଲେ ଲୋକମାନେ ଭାବିବେ ସିବିଆଇ ତଦନ୍ତ ଏକ ପ୍ରହସନ ଓ କେବଳ ରାଜନୈତିକ ଉଦେଶ୍ୟ ପାଇଁ କରାଯାଇଛି !
