ପୂର୍ବତନ ମନ୍ତ୍ରୀ ତଥା ପିପିଲି ବିଧାୟକ ପ୍ରଦୀପ ମହାରଥୀଙ୍କର ଗତକାଲି ବିଳମ୍ବିତ ରାତ୍ରିରେ ପରଲୋକ ଘଟିଛି । ଅସୁସ୍ଥତା ଯୋଗୁଁ ଏକ ଘରୋଇ ଡାକ୍ତରଖାନାରେ ଚିକିତ୍ସିତ ଅବସ୍ଥାରେ ବିଜେଡିର ଏହି ବରିଷ୍ଠ ନେତାଙ୍କ ସ୍ବାସ୍ଥ୍ୟାବସ୍ଥା ବିଗିଡି ଯାଇଥିଲା । ଭେଣ୍ଟିଲେଟର ସାହାଯ୍ୟରେ ଚିକିତ୍ସା ଚାଲିଥିବାବେଳେ ତାଙ୍କୁ ବଞ୍ଚାଇବା ସମ୍ଭବ ହୋଇନଥିଲା । ମୃତ୍ୟୁ ବେଳକୁ ପାଖରେ ତାଙ୍କର ପତ୍ନୀ ପ୍ରତିଭା ମହାରଥୀ, ପୁଅ ରୁଦ୍ରପ୍ରତାପ, ଝିଅ ପଲ୍ଲବୀ ଓ ପରିବାରର ଅନ୍ୟ ସଦସ୍ୟମାନେ ଉପସ୍ଥିତ ଥିଲେ । ତାଙ୍କର ମୃତ୍ୟୁ ଖବର ପ୍ରସାରିତ ହେବାକ୍ଷଣି ପିପିଲି ନିର୍ବାଚନ ମଣ୍ଡଳୀ ସମେତ ବହୁ ସ୍ଥାନରେ ଶୋକର ଛାୟା ଖେଳିଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହାରଥୀଙ୍କ ବିୟୋଗରେ ଶୋକ ପ୍ରକାଶ କରିବାସହ ମହାରଥୀଙ୍କୁ ‘ଯଥାର୍ଥରେ ସେ ଥିଲେ ଜନତାଙ୍କ ନେତା’ ବୋଲି ନିଜ ଶୋକବାର୍ତ୍ତାରେ କହିଛନ୍ତି ।
ଛାତ୍ର ରାଜନୀତିରୁ ନିଜର କ୍ୟାରିୟର ଆରମ୍ଭ କରିଥିବା ପ୍ରଦୀପ ମହାରଥୀ ପିପିଲିରୁ ୭ ଥର ବିଧାୟକ ଭାବେ ନିର୍ବାଚିତ ହୋଇଥିଲେ । ୧୯୮୫ ରେ ସେ ଜନତା ପାର୍ଟି, ୧୯୯୦ରେ ଜନତା ଦଳ ୨୦୦୦, ୨୦୦୪, ୨୦୦୯, ୨୦୧୪ ଓ ୨୦୧୯ରେ ପିପିଲିରୁ ବିଜୁ ଜନତା ଦଳ ଟିକେଟରେ ନିର୍ବାଚିତ ହୋଇ ନିଜକୁ ଅପ୍ରତିଦ୍ୱନ୍ଦୀ ନେତା ଭାବେ ସାବ୍ୟସ୍ତ କରିଥିଲେ । ବିଜେଡି ର ବହୁ ଗୁରୁତ୍ୱପୂର୍ଣ ପଦବୀସହ ଏକାଧିକବାର ନବୀନଙ୍କ ମନ୍ତ୍ରିମଣ୍ଡଳରେ ମଧ୍ୟ ସାମିଲ ହୋଇ କୃଷି, ପଶୁସଂପଦ , ପଂଚାୟତିରାଜ, ପାନୀୟ ଜଳ ଯୋଗାଣ ମନ୍ତ୍ରୀ ଭାବେ କାର୍ଯ୍ୟ ତୁଲାଇଥିଲେ । ବିଧାନସଭା ଭିତରେ ଓ ବାହାରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ ପ୍ରଦୀପ ମହାରଥୀ । ରାଜନୈତିକ କ୍ୟାରିୟରରେ ଏକାଧିକବାର ବିବାଦୀୟ ହୋଇଥିଲେ ମଧ୍ୟ, ନିର୍ବାଚନ ରାଜନୀତିରେ ସେ ପିପିଲି ବାସୀଙ୍କ ସମର୍ଥନ ହାସଲ କରିଥିଲେ । ବହୁଦିନଧରି ପିପିଲିରୁ ନିର୍ବାଚିତ ହୋଇ ବିଧାନସଭାକୁ ଆସୁଥିବା ପ୍ରଦୀପ ମହାରଥୀ ନିଜର ଚାଲିଚଳଣି ଓ ବୟାନ ବାଜି ଯୋଗୁ ସମସ୍ତଙ୍କର ଦୃଷ୍ଟି ଆକର୍ଷଣ କରୁଥିଲେ ।ନାଟକୀୟ ଢ଼ଙ୍ଗରେ ଡାଇଲଗ ବିଧାନସଭା ଭିତରେ ଓ ଗଣମାଧ୍ୟମ ଆଗରେ ତାଙ୍କର ବୟାନ ସବୁଦିନ ପାଇଁ ଲୋକଙ୍କ ହୃଦୟରେ ବଞ୍ଚେଇ ରଖିବ । ମହାରଥୀଙ୍କ ବିୟୋଗରେ ବହୁ ରାଜନେତା ଦଳଗତ ନିର୍ବିଶେଷରେ ଶୋକ ପ୍ରକାଶ କରିବାସହ ତାଙ୍କର ପରିବାରକୁ ସମବେଦନା ଜଣାଇଛନ୍ତି । ପ୍ରଦୀପ ମହାରଥୀଙ୍କ ପରି ଜଣେ ଟାଣୁଆ ନେତା ଓ ଦକ୍ଷ ସଂଗଠକଙ୍କ ସ୍ଥାନ ବିଜେଡି ରାଜନୀତିରେ ଅପୂରଣୀୟ ହୋଇ ରହିବ ।
