ଓଡ଼ିଶାର ୨ଟି ବିଧାନ ସଭା ଆସନ ବାଲେଶ୍ୱର ଓ ତିର୍ତ୍ତୋଲ ଆସନ ପାଇଁ ଉପନିର୍ବାଚନ ହେଉଛି । ଵିଜ୍ଞପ୍ତି ପ୍ରକାଶ ପାଇବା ପରେ ଦୁଇ ପ୍ରମୁଖ ରାଜନୈତିକ ପ୍ରତିଦ୍ବନ୍ଦୀ ବିଜେଡି ଓ ବିଜେପି ମଇଦାନକୁ ଓହ୍ଲାଇ ସାରିଲେଣି । ଏପରିକି ଦୁଇ ଦଳ ପ୍ରାର୍ଥୀ ତାଲିକା ମଧ୍ୟ ଘୋଷଣା କରିଦେଲେ । ବିଜେପି ପକ୍ଷରୁ ବାଲେଶ୍ୱର ଆସନରେ ଦିବଂଗତ ବିଧାୟକ ମଦନ ମୋହନ ଦତ୍ତ ଙ୍କ ପୁଅ ମାନସ ଦତ୍ତ ନିର୍ବାଚନ ଲଢ଼ିବେ ଓ ତିର୍ତ୍ତୋଲ ରୁ କଂଗ୍ରେସରୁ ବିଜେପି କୁ ଆସିଥିବା ରାଜକିଶୋର ବେହେରା ନିର୍ବାଚନ ଲଢ଼ିବେ । ସେହିପରି ବିଜେଡି ରୁ ବାଲେଶ୍ୱର ଆସନରେ ନବାଗତ ସ୍ୱରୂପ ଦାସ ନିର୍ବାଚନ ଲଢ଼ୁଥିବା ବେଳେ, ତିର୍ତ୍ତୋଲ ଆସନରେ ଦିବଂଗତ ନେତା ବିଷ୍ଣୁ ଦାସ ଙ୍କ ପୁଅ ବିଜୟ ଶଙ୍କର ଦାସ ନିର୍ବାଚନ ଲଢ଼ିବେ ବୋଲି ଦଳ ପକ୍ଷରୁ ଘୋଷଣା କରାଯାଇଛି ।
ବାଲେଶ୍ୱର ଆସନଟି ଉଭୟ ଦଳ ପାଇଁ ଏବେ ସମ୍ମାନ ର ପ୍ରଶ୍ନ । ବିଜେପି ଏହି ଆସନଟିକୁ ନିଜ ଅକ୍ତିଆର ରେ ରଖିବା ପାଇଁ ଚାହିଁବ ଓ ବିଜେଡି ଏହି ଆସନ ଦଖଲକୁ ନେବାକୁ ମଧ୍ୟ ଚେଷ୍ଟା କରିବ । ବିଜେପି ର ପ୍ରାର୍ଥୀଙ୍କ ଏଠାରେ ପୁଞ୍ଜି ହେଉଛି ଅନୁକମ୍ପା ଭୋଟ । ମିଳିଥିବା ଖବର ଅନୁଯାୟୀ ବିଜେପି ଜିତିଲେ ଶ୍ରେୟ ଯିବ କେନ୍ଦ୍ରମନ୍ତୀ ଧର୍ମେନ୍ଦ୍ର ପ୍ରଧାନ ଙ୍କୁ ଓ ହାରିଲେ ଶ୍ରେୟନେବେ ଅନ୍ୟତମ କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀ । ଉଭୟଙ୍କ ସମର୍ଥକଙ୍କ ମଧ୍ୟରେ ସମ୍ପର୍କ ଭଲନାହିଁ, ମାତ୍ର ବରିଷ୍ଠ ବିଜେପି ନେତା ଖାରବେଳ ସ୍ୱାଇଁ ଙ୍କ ଗୁରୁତ୍ୱ ହ୍ରାସ କରିବା ପାଇଁ ୨ କେନ୍ଦ୍ରମନ୍ତ୍ରୀ ଏକାଠି ହୋଇଛନ୍ତି । ବାଲେଶ୍ୱର ରୁ ଏକାଧିକ ବାର ସାଂସଦ ଥିବା ଖାରବେଳ ସ୍ୱାଇଁଙ୍କୁ ଦଳ ମଧ୍ୟ ଏଥର ଅଣଦେଖା କରିଛି । ଏହି ଉପନିର୍ବାଚନରେ ମଧ୍ୟ୍ୟ ଖାରବେଳ ସ୍ୱାଇଁଙ୍କୁ ଦଳ ପ୍ରାର୍ଥୀ କରିପାରିଥାନ୍ତା । ମାତ୍ର ତାହା ନକରି ଖାରବେଳ ସ୍ୱାଇଁଙ୍କ ପତିଆରା କମାଇବାପାଇଁ ଧର୍ମେନ୍ଦ୍ର ପ୍ରଧାନ ଓ ପ୍ରତାପ ଷଡ଼ଙ୍ଗୀ ତାଙ୍କୁ ନିର୍ବାଚନ ପ୍ରକ୍ରିୟା ଠାରୁ ଦୁରେଇ ରଖିଛନ୍ତି । ରାଜନୀତି ସମୀକ୍ଷକଙ୍କ କହିବା ଅନୁସାରେ ଖାରବେଳ ସ୍ୱାଇଁଙ୍କ ଭଳି ଯୋଗ୍ୟ ଓ ବରିଷ୍ଠ ନେତାଙ୍କୁ ହତାଦର କରିବାର ଫଳ ହୁଏତ ଏହି ନିର୍ବାଚନକୁ ପ୍ରଭାବିତ କରିପାରେ । ଗତ ନିର୍ବାଚନରେ ଖାରବେଳ ସ୍ୱାଇଁଙ୍କୁ ଜାଣିଶୁଣି ବିଜେପି ରାଜ୍ୟ ନେତୃତ୍ୱ କନ୍ଧମାଳରେ ଠିଆକରାଇ ହରାଇବା ଏବଂ ଏହି ନିର୍ବାଚନରେ ମଧ୍ୟ କୋଣଠେସା କରିବା ଉଦ୍ଦେଶ୍ୟରୁ ସ୍ପଷ୍ଟ ଜଣାପଡ଼ୁଛିଯେ, ଖାରବେଳଙ୍କ ଭଳି ନିର୍ମଳ ଭାବମୂର୍ତ୍ତି ସମ୍ପନ୍ନ ନେତାଙ୍କର ଓଡିଶା ବିଜେପିରେ ଆବଶ୍ୟକତା ନାହିଁ ।
ଏଣୁ ବାଲେଶ୍ୱର ଉପନିର୍ବାଚନର ଫଳାଫଳ କିପରି ବିଜେପି ସପକ୍ଷରେ ଯିବ ତାହା ଏକ ବଡ ପ୍ରଶ୍ନ । ପ୍ରାର୍ଥୀ ହେଲେ ଧର୍ମେନ୍ଦ୍ର ପ୍ରଧାନଙ୍କ କ୍ୟାମ୍ପର… ପ୍ରଚାର କରିବେ ପ୍ରତାପ ଷଡ଼ଙ୍ଗୀଙ୍କ ସମର୍ଥକ…, ପ୍ରଚାର ଦାୟିତ୍ୱ ରେ ରହିବେ ବିଜେଡିରୁ ଆମଦାନୀ ନେତା ରଘୁନାଥ ମହାନ୍ତି… ଆଉ ନିର୍ବାଚନରୁ ଦୂରେଇ ରହିବେ ବାଲେଶ୍ୱର ଭୋଟରଙ୍କ ପସନ୍ଦର ନେତା ଖାରବେଳ ସ୍ୱାଇଁ । ଏହି ସମୀକରଣ କୁ ନେଇ ବିଜେପି କରିବା ପ୍ରତିଦ୍ୱନ୍ଦିତା ।
ସେହିପରି ତିର୍ତ୍ତୋଲ ଆସନରେ ମଧ୍ୟ ବିଜେପି ର ଦୁଇଟି ଶିବିର । ଗୋଟିଏ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କର ଅନ୍ୟଟି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କର । ବିଜେପି ନିଜ କ୍ୟାଡରରଙ୍କୁ ପ୍ରାର୍ଥୀ ନକରି କଂଗ୍ରେସରୁ ଆମଦାନୀ ନେତା ରାଜ କିଶୋରଙ୍କ ବେହେରାଙ୍କୁ ପ୍ରାର୍ଥୀ କରିବା ଘଟଣାକୁ ଦଳ ଭିତରେ ସହଜରେ ଗ୍ରହଣ କରିପାରୁନାହାନ୍ତି ବରିଷ୍ଠ ନେତା ଓ କର୍ମୀ ମାନେ । ଏପରିକି ପ୍ରାର୍ଥୀ ଚୟନ ନେଇ ଅପରାଜିତା ଷଡ଼ଙ୍ଗୀ ଙ୍କ କ୍ୟାମ୍ପ ଖୁସି ନାହିଁ ବୋଲି ଶୁଣିବାକୁ ମିଳୁଛି । ତେଣୁ ଏହି ଆସନରେ ଯଦି ଧର୍ମେନ୍ଦ୍ର ଓ ଅପରାଜିତା ଙ୍କ କ୍ୟାମ୍ପ ଭିତରେ ତିକ୍ତତା ବଢେ ତେବେ ନିର୍ବାଚନ ଫଳାଫଳ କେମିତି ଯିବ ବିଜେପି ହାତକୁ ?
ଏବେ ଆସିବା ବିଜେଡି ର ପ୍ରାର୍ଥୀ ଚୟନ ପ୍ରକିୟା ଆଡକୁ । ତିର୍ତ୍ତୋଲରେ ଦିବଂଗତ ନେତା ବିଷ୍ଣୁ ଦାସଙ୍କ ପୁଅ ବିଜୟଶଙ୍କରଙ୍କ ବ୍ୟତିତ ବିଜେଡି ପାଇଁ ଅନ୍ୟ ବିକଳ୍ପ ନଥିଲା । ଯଦିଓ ସାଂସଦ ରାଜଶ୍ରୀ ମଲ୍ଲିକଙ୍କ ସମର୍ଥକ ଅନ୍ୟ ପ୍ରାର୍ଥୀଙ୍କ ସପେକ୍ଷରେ ଥିଲେ ମାତ୍ର ରାଜନୈତିକ ପର୍ଯ୍ୟବେକ୍ଷକଙ୍କ ମତରେ ବିଜୟଶଙ୍କର ହିଁ ବର୍ତମାନ ସମୟର ଆବଶ୍ୟକତା ବୋଲି ବିଜେଡି ଅନୁଭବ କରିଛି ଓ ତାଙ୍କୁ ଅନୁକମ୍ପା ଭୋଟ ଦ୍ୱାରା ଜିତାଇବା ପାଇଁ ଚେଷ୍ଟା କରିବ ।
ସେହିପରି ବାଲେଶ୍ଵରେ ଜୀବନ ପ୍ରଦୀପ ଦାସ ଓ ରବୀନ୍ଦ୍ର ଜେନା ଙ୍କୁ ପ୍ରାର୍ଥୀ ନକରି ବିଜେଡି ଜଣେ ନବାଗତା ଙ୍କୁ ଦଳର ପ୍ରାର୍ଥୀ କରିଛି । ସ୍ୱରୂପ ଦାସଙ୍କୁ ପ୍ରାର୍ଥୀ କରି ବିଜେଡି ନିଜର ଗୋଷ୍ଠୀକନ୍ଦଳ କୁ ଏଡ଼ାଇବାର ପ୍ରୟାସ କରିଛି । ସବୁଠାରୁ ଗୁରୁତ୍ୱପୂର୍ଣ ହେଲା ବିଜେଡି ଦଳ ଭିତରର ମନାନ୍ତର କୁ ସମାଧାନ କରିବା ସହ ବରିଷ୍ଠ ନେତା ଅରୁଣ ଦେ ଙ୍କୁ ନିଜ ପକ୍ଷକୁ ଆଣି ଏକ ବଡ ନିଷ୍ପତ୍ତି ନେଇଛି । ବାଲେଶ୍ୱର ସଦରରେ ଅରୁଣ ଦେ ଙ୍କ ବହୁ ସମର୍ଥକ ରହିଛନ୍ତି । ତେଣୁ ଦଳୀୟ କନ୍ଦଳକୁ ପ୍ରଶମିତ କରିବା ପାଇଁ ବିଜେଡି ଆପ୍ରାଣ ଉଦ୍ୟମ ଜାରି ରଖିଛି । ଏପରିକି ଶେଷ ମୁହୁର୍ତ୍ତ ପର୍ଯ୍ୟନ୍ତ ବିଜେଡି ନିଜର ରଣନୀତିରେ ମଧ୍ୟ ବ୍ୟାପକ ପରିବର୍ତ୍ତନ କରିପାରେ ବାଲେଶ୍ୱର ଆସନକୁ ହାତେଇବା ପାଇଁ ।
ତେଣୁ ଦୁଇଟି ଆସନରେ ସମୀକରଣ ଓ ପ୍ରାର୍ଥୀ ଚୟନକୁ ଦେଖିଲେ ଏକଥା ସ୍ପଷ୍ଟ ଭାବରେ କୁହାଯାଇପାରିବ ଯେ ତିର୍ତ୍ତୋଲରେ ବିଜେଡି ପାଇଁ ମୁକାବିଲା ସହଜସାଧ୍ୟ ହୋଇପାରେ ଓ ବାଲେଶ୍ୱର ରେ ମଧ୍ୟ ବିଜେଡି ର ଅଙ୍କ ଭୁଲନହୋଇପାରେ ।